“මාත් එක්ක ඉස්කෝලේ ගිය උන් කසාඳ බඳිනවා. බබාලාගේ පින්තූර දානවා. මම දෙයියනේ කියලා ඒ සේරට ම ලයික් කරනවා"
මේ දවස්වල ෆේස්බුක් එකේ දැකගන්න ලැබෙන සුලභ කතාවක් තමයි ඕක. මේ දවස්වල දකින්න ලැබෙන වෙඩින් තොගේ හැටියට, කාටකාටත් ඔහොම හිතෙන එකේ පුදුමයක් නැහැ.
කාලෙන් කාලෙට අපේ වෙඩින්වලට එකඑක අයිටම් එකතුවෙනවනේ. ප්‍රී-වෙඩින් ෂූට් කියන්නෙත් එහෙම එකක්. මේක ඇවිල්ලා නම් දැන් ටිකක් කල්. හැබැයි තවම ඒ කාලේ තිබුණු රස්නේ තියෙනවා. සමහරු කියන විදියට මේක මේ සල්ලිවලට කරන්න දවල් නැතිකමට කරන වැඩක්.
ඒ කතා මොනවා වුණත්, ප්‍රී-වෙඩින් ෂූට් එකක් කියන්නේ ෆොටෝග්‍රැෆර්ට විතරක් නෙවෙයි, කපල් එකටත් ක්‍රියේටිව් වෙන්න ලැබෙන අවස්ථාවක්. අන්න ඒ නිසාමයි අපි හිතුවේ හොඳ ප්‍රී-වෙඩින් ෂූට් එකක් කරගන්න කපල් එකකට කරන්න පුළුවන් දේවල් ටිකක් ගැන කියන්න.
1. තමන් කැමති ෆොටෝග්‍රැෆර් කෙනෙක් ව තෝරගන්න
Image Credits : Studio 4U
හැබැයි පින්තූර හොඳයි, ලස්සනයි කියලා අතේ තියෙන සබ්බ සකලමනාව ම දීලා ප්‍රී-ෂූට් එක කරන්න ලෑස්ති වෙන්න එපා හොඳේ. මොකද මේක විතරක් නෙවෙයි, වෙඩින් එකකුත් තියෙනවනේ.
2. ෆොටෝග්‍රැෆර් එක්ක හොඳ කතාබහක්
Image Credits : Memory Creations
“පින්තූරෙකට වචන දහසක් කතා කරන්න පුළුවන්” කියලා ප්‍රසිද්ධ කතාවක් තියෙනවනේ. ඉතින් ප්‍රී-වෙඩින් ෂූට් එකේ ෆොටෝවලින් වෙන්නේ බඳින්න ඉන්න ජෝඩුවගේ තියෙන ආදරේ පෙන්වන එක. මේක ෆොටෝග්‍රැෆර්ට හිතුමතේ කරන්න පුළුවන් වැඩක් නෙවෙයි. කපල් එකේ උදව්වත් සෑහෙන්න ඕනේ වෙනවා.
තමන්ට ඕනේ පින්තූර මොන වගේද, තීම් එක කොයි වගේද කියලා ෆොටෝග්‍රැෆර් එක්ක කතා කරගන්න ඕනේ. දැනට හිට්වෙලා තියෙන ප්‍රී-ෂූට් ෆොටෝ ස්ටයිල් ගැන වගේ ම, තමන් කැමති තාලේ ෆොටෝවලට හරි යන ලොකේෂන් තෝරගන්නත් ෆොටෝග්‍රැෆර් එක්ක දාන මේ කතාව සෑහෙන්න වැදගත්.
3. ලොකේෂන් කීපයක්
Image Credits : Studio N Style
පින්තූර සේරම එක ම ලොකේෂන් එකේ ගන්නකොට ෆොටෝ ගන්න කෙනාට වුණත් බෝරින් වෙන්න පුළුවන්. වටපිටාවත් එක ම නිසා දකින කෙනෙක්ට වුණත් මේකේ ඒ හැටි ලස්සනක් පේන්නේ නැහැ. ඒ නිසා හොඳම දේ තමයි ලොකේෂන් කීපයක් තෝරගන්න එක.
හැමෝම කරන විදියට පාක් එකට ගිහින් පින්තූර ගන්නවා වෙනුවට, ටිකක් වෙනස් විදියට වැඩේ ගොඩදාන එකේ අමුතු ගතියක් තියෙනවා. මොකද ගොඩක් අය හිතන්නේ කොළඹින් පිටට ගිහින් ගස්කොළන් එක්ක ෆොටෝ ගන්න එක තරම් වෙන කිසි දෙයක් හරි නැහැ කියලනේ. ඒ වුණාට නිකමට බලන්නකෝ පිටකොටුවේ වීදීවල ගහපු ප්‍රී-ෂූට් ෆොටෝස් ටිකක් අරගෙන. ඒවයේ තියෙන්නේ අමුතු ලස්සනක්.
4. ගැලපෙන ඇඳුමක්
Image Credits : Studio Sathya
අපේ ගොඩක් අය ඉවක් බවක් නැතුව අනාගන්න තැනක් තමයි මේ. කැමරාවට ලස්සනට ඉන්න ඕනේ බව ඇත්ත. ඒ වුණාට මූණේ හත්තට්ටුවක් මේකප් අතුල්ලගෙන, ලොකේෂන් එකට කිසිම ගැළපීමක් නැති ඇඳුම් ඇඳගෙන ගන්න ෆොටෝස් හරි ම අවුල්. කිසිම නැචුරල් ගතියක් නැහැ. අනික අව්වට මේකප් ටික දියවෙලා ගියාට පස්සේ තවත් සවුත්තු වෙනවා. ඒ නිසා පොඩි මේකප් එකක් එක්ක, සිම්පල් ඇඳුමක් දාගත්ත ම, ෆොටෝ එකකට වුණත් පෝස් කරන්න ලේසියි. ඒ විතරක් නෙවෙයි, දෙන්නගේ ඇඳුම්වල, අඳින පාටවලත් ගැළපීමක් තියාගන්න ඕනේ. මේ වගේ දේවල්වලටත් ෆොටෝග්‍රැෆර්ගේ අදහස් සෑහෙන්න වටිනවා. මොකද පසුබිමේ මොන දේවල් තිබුණත්, හයිලයිට් වෙලා පේන්න ඕනේ ඔය දෙන්නවයි.
ෆොටෝවලට පෝස් කරන විදිය ගැනත් මෙතනදී පොඩ්ඩක් මතක් නොකළොත් ඒක අඩුවක්. සමහරු කැමති සාම්ප්‍රදායික විදියට කපල් එක පෝස් කරලා ඉන්න ෆොටෝවලට. ඔය අතරේ කට්ටිය ඉන්නවා ෆන් ටයිප් එකේ පින්තූරවලට ආස අයත්. තමන් තෝරගන්නේ මේ ජාති දෙකෙන් මොකක්ද කියලා තීරණය කරලා, අන්න ඒකට හරි යන විදියටයි ඇඳුම තීරණය කරන්න ඕනේ.
5. හිතේ සතුට
Image Credits : Studio U
මොන වැඩක් වුණත් හරියට කරගන්න පුළුවන් වෙන්නේ හිතේ සතුටින් කළොත් විතරයිනේ. මෙතැනටත් ඒ තත්ත්වය අදාළ වෙනවා. තරහෙන් හෝ හිතේ ප්‍රශ්න තියාගෙන පින්තූරවලට ඉන්න අමාරුයි. එහෙම ඉඳලා ගන්න ෆොටෝස් කැත වුණා ම අන්තිමට බැණුම් අහන්නේ කැමරාවේ පිටිපස්සේ ඉන්න මනුස්සයයි. ඒ නිසා තියෙන ප්‍රශ්නයක් අමතක කරලා, එහෙම නැත්තන් ගෙදර තියලා මේ වැඩේට යනවනම් තමයි හොඳ.
අනික වෙනත් හදිසි ගමන් බිමන් යන්න තියාගෙන මේ දවස බුක් කරන්න එපා. මොකද මේක බොහොම සීරුවෙන් කරන්න ඕනේ වැඩක්. හදිසියට දුවන්න බලාගෙන ෆොටෝ ගන්න ගියොත් ඒකෙනුත් මේ වැඩේ අසාර්ථක වෙන්න පුළුවන්.
6. වැඩ දෙකට ම එකම ෆොටෝග්‍රැෆර්
Image Credits : Danushka Senadeera Photography
ප්‍රී-වෙඩින් ෂූට් එකේ පින්තූර ගහන ෆොටෝග්‍රැෆර් ම වෙඩින් එකේ ෆොටෝග්‍රැපිවලට ගන්න එකේ ලොකු වාසියක් තියෙනවා. එකක් තමයි ගාණ පොඩ්ඩක් අඩු වෙන එක. අනිත් දේ තමයි පින්තූරවල ස්ටයිල් එකේ ගැළපීමක් තියෙන එක.
ප්‍රී-වෙඩින් ෂූට් එකේ පින්තූර ගත්ත නිසා ම, වෙඩින් එක වෙද්දී කපල් එකට හොඳට ම හරි යන පෝස්, ඈන්ගල් මොනවද කියන එක ඡායාරූප ශිල්පියා දන්නවා. ඒ නිසා එක ම පෝස් එක රිපීට් වීමක් වෙන්න තියෙන අවස්ථාව හරි අඩුයි.
මේ වගේ තවත් ටිප්ස් තියෙනවනම්, අපට කමෙන්ට් එකක් දාන්න හොඳද. මේ අවුරුද්දේ බඳින්න ඉන්න උදවිය ඉන්නවනම් සෑහෙන්න වැදගත් වේවි.
