සිංහල භාෂාවෙන් කාව්‍යකරණයේ යෙදෙන කවියන් කිවිඳියන් ගැන අපි පටන්ගත්ත ලිපි මාලාවේ තෙවැන්න මේ. එහි පළමු ලිපිය කියවන්න මෙතන ක්ලික් කරන්න. දෙවැනි ලිපිය කියවන්න මෙතන ක්ලික් කරන්න.
මෙවර ලිපියෙනුත් අපි ලංකාවේ දක්ෂ සහ ප්‍රවීණ කවියන් කිවිඳියන් දස දෙනෙක් ගැන කතා කරනවා.
රංජිත් මල්ලියාවඩු
1989 දී ‘ඇස් ලැබීම’ නම් පද්‍ය සංග්‍රහය පළ කරමින් සිය නිර්මාණ චාරිකාව ඇරඹු රංජිත් මල්ලියාවඩු, පහන්වැට නිර්මාණ කේන්ද්‍රයෙන් තමයි කලා ලොවට පිවිසුණේ. ඉන්පසුව ඔහු මංගල දියවර, නිදි නැති ගඟ, යළි ගලා යනු පිණිස වැනි කවි පොත් සහ කුරුලු ලියද්ද, විකට ඇඳුම, වතුසුදු මල්, පොත් කුරුල්ලා වැනි ළමා කතා ද ලියා තිබෙනවා. ඔහුගේ ‘සහෝදර මුහුණුවර’ නම් කාව්‍ය කෘතිය 2018 වසරේ රජත පුස්තක සහ රාජ්‍ය සාහිත්‍ය සම්මාන උළෙලවල අවසන් වටයට තෝරා ගැනුණා.
මහින්ද ප්‍රසාද් මස්ඉඹුල
පොත්ගුල්ලො අතරේ ‘සෙංකොට්ටන්’ නොකියවපු කෙනෙක් නං හොයාගන්න අමාරුයි. අතිශයින් ජනප්‍රිය වුණ, ඒ වගේ ම 2012 වසරේ පළ වූ විශිෂ්ටතම නවකතාවට හිමි සම්මාන රාශියක් දිනාගත් ‘සෙංකොට්ටන්’ නවකතාවේ රචකයා විදිහට මහින්ද ප්‍රසාද් මස්ඉඹුල හැමෝම හඳුනගත්තට, ඊට කලින් ඔහු කවියෙක්. හිරුත් හිම පියල්ලක, ඇහි පියන් ඇහැරිලා වැනි කවි පොත්වලින් කාව්‍ය පාඨකයන්ගේ හිත ඇදගත් ඔහු පසුව ‘මාණික්කාවත’ නම් නවකතාවත්, ‘අපොයියාව’ නම් යොවුන් කතාවත් රචනා කළා.
රුවන් බන්දුජීව
නව පරපුරේ අතිදක්ෂ කවියෙකු වන රුවන් බන්දුජීව මේ වෙද්දි පළ කරලා තියෙන්නේ ‘මීළඟ මීවිත’ කියන කවි පොත විතරයි. හැබැයි ඔහුගේ කාව්‍ය නිර්මාණ පරිචය ඊට වඩා බොහොම පුළුල්. විශේෂයෙන් ෆේස්බුක් ඉන්නවා නම් ඔහු ඉඳහිට වුණත් පළ කරන ඉතා හරවත් රසවත් කවි ඔබට අහුලගන්න පුළුවන්.
කල්පනා ඇම්බ්‍රෝස්
මේ නිහඬ වෙරළට එන්න, ඔබ ගැඹුරු නින්දක, නොපවතිනු වස් ප්‍රේමයව පවතිමි, පියා නොහැඹු පියාපත් වැනි කවි පොත් ලියූ මාලතී කල්පනා ඇම්බ්‍රෝස් මේ කාලේ ලේඛකයන් අතර ඉන්න දක්ෂතම කිවිඳියක්. haikuaddara.blogspot.com බ්ලොග් අඩවියට පිවිසුණොත් ඔබට ඇගේ තවත් කවි කියවන්න පුළුවන්. ඇගේ ෆේස්බුක් පිටුවට පිවිසිලා බලන්නත් අමතක කරන්න එපා.
ලක්ශාන්ත අතුකෝරළ
අමාවකේ සඳක් සිඹිමි, යටි වියන, හිතග්ගිස්සෙ නැතක් මොට්ටු, වැසි ඉසෙන ඉසව්, ඊ, සුසුමකින් සුළි සුළඟ, සමහර කමටහන්, අනබිසෙස් අබිනික්මන් යන කාව්‍ය කෘති රචනා කළ ලක්ශාන්ත අතුකෝරළ වෘත්තියෙන් ශ්‍රී ලංකා මහ බැංකුවේ නීතිඥවරයෙක්. ‘සමහර කමටහන්’ කෘතියට 2016 වසරේ විශිෂ්ටතම කාව්‍ය සංග්‍රහයට හිමි රාජ්‍ය සාහිත්‍ය සම්මානය, ගොඩගේ සාහිත්‍ය සම්මානය සහ රජත පුස්තක සම්මානය හිමි වුණා. ඉහත කී කවි පොත්වලට අමතරව ඔහු සිරගත නොවූ සිතුවිලි, සුප්‍රකට චරිත ගැන අප්‍රකට කතා, සිපුම් සීරුම් කෙනිත්තුම් යන පරිවර්තන ද සම්පාදනය කර තිබෙනවා.
ළහිරු කිතලගම
පිනි දිය වැස්ස සහ කවුළු ඇස පාමුල නම් කාව්‍ය කෘති ද්විත්වය සහ කළු සමනලයා නම් තීරු ලිපි එකතුව රචනා කර ඇති ළහිරු කිතලගමත් නූතන අතර ඉදිරි පෙළේ ඉන්නා කෙනෙක්. ‘Poem කවිය’ නමින් මේ දිනවල ඔහු කරගෙන යන යූටියුබ් චැනල් එක පැත්තටත් ගොඩ වෙන්න අමතක කරන්න එපා.
කාංචනා අමිලානි කරුණාමුනි
පහුගිය දිනවල ලොකු කතාබහක් ඇති කරපු ‘ගුහා සටන’ ලියූ ලේඛිකාව තමයි කාංචනා අමිලානි කරුණාමුනි. දැනට ලේක්හවුස් පුවත්පත් සමාගමේ පත්‍ර කලාවේදිනියක් වශයෙන් කටයුතු කරන ඇය කිවිඳියක් විදිහටයි සාහිත්‍ය ලෝකයට පිවිසුණේ. ගම්මිරිස් කුරුල්ලා, බූමරංගය ඔබේ ඇස් දෙක, ප්‍රේමයේ කාර්තු ඇගේ කවි පොත්. thinkland.net නමින් ඇය බ්ලොග් අඩවියක් පවත්වාගෙන යනවා.
ප්‍රියලාල් කොග්ගලගේ
2016 දී රැහැයියනි රැය ගෙවුණි කාව්‍ය සංග්‍රහය පළ කරමින් පාඨක අවධානය දිනාගත් ප්‍රියලාල් කොග්ගලගේ, වෘත්තියෙන් මෘදුකාංග ඉංජිනේරුවරයෙක්. බොලිවුඩ් නළු සුශාන්ත් සිං රාජ්පුත් සිය දිවි නසාගත් දා ප්‍රියලාල් කොග්ගලගේ සිය ෆේස්බුක් ගිණුමේ සටහන් කළ මේ කවිය හුඟ දෙනෙකුගේ අවධානය පැහැරගත්තා. සමහර විට ඔබත් දකින්න ඇති.
ටිම්රාන් කීර්ති
සාදය සූදානම් ය, යන්නං චන්දරේ, පෙම්බරියගෙන් වෙන් වුණු ලූලෙක් හැරෙයි ඇළකට ආදී කාව්‍ය සංග්‍රහ ලියූ ටිම්රාන් කීර්ති, 2020 වසරේ ‘ඒ ජෙට්ටෙකේ ගියෙ සමන්සිරිමයි’ නමින් අලුත් කවි පොතක් එළිදැක්වූවා. ඒ වගේ ම ටිම්රාන් කීර්ති තමයි පහුගිය කාලේ බොහොම ජනප්‍රිය වුණ, සාදර බණ්ඩාර ගයන ‘පොඩ්ඩියේ’ ගීතයේ පද රචකයා.
ඩොමිනික් චන්ද්‍රසාලි
පබාවතීට කවක්, ගාලු පාර දිග හැලුණ සිනා සළු, කාලය ම සිතුවිල්ලක් වූ මිනිත්තුව යන පද්‍ය සංග්‍රහ පළ කළ ඩොමිනික් චන්ද්‍රසාලි, කවියෙක් වගේ ම අතිදක්ෂ චිත්‍ර ශිල්පියෙක්. විශේෂයෙන් ම වෝල් ආට්, ග්‍රැෆිටි ශිල්පය ඇතුළේ දස්කම් දක්වන ඔහු පොත් පිටකවර නිර්මාණ ශිල්පියෙකු වශයෙනුත් නමක් දිනා සිටිනවා. https://www.facebook.com/dominiklk/ ෆේස්බුක් පිටුවෙන් ඔහුගේ නිර්මාණ විඳගන්න පුළුවනි.
