මේ දවස් වල අපේ කට්ටිය ඉන්නෙ බිසී එකෙත් උපරිම එකේ. ඔෆිස් වල වැඩ වැඩි එක නම් කොහොම හරි බැලන්ස් කර ගත්ත කියමුකො. එහෙන් මෙහෙන් එල්ලගෙන කරන කෝස් වල එක්සෑම් ටික මතක් වෙද්දි තමයි බඩ පපුව දාලා යන්නෙ. හැරත් අපි මැරීගෙන වැඩ කරද්දි යාලුවො සෙට් වෙලා ටුවර් යනකොට! කොහොම වාවන්නද?
ඔය වෙලාවට තමයි හිතෙන්නෙ තනි දවසෙ ටුවර් එකක් හරි ගිහින් එන්න. එක යාලුවෙක් සෙට් කරගත්ත නම්, බයික් එකේ ගිහින් ආවා. නැත්නම් බස් එකකට කෝච්චියකට හරි ගොඩ වෙන්න බැරියැ. ඒත් යන්නෙ කොහෙද යන්නෙ?
හරි, ඒක ගැන අවුලක් ගන්න එපා, අපි කියන්නම් යන්න තැන්. එහෙනම් ලෑස්ති වෙන්නකො මේ වීක් එන්ඩ් එකේ, වන් ඩේ ටුවර් එකක් දාලා එන්න. ඔන්න පහතින් තියෙනව තැන් ටික.
1. සීතාවක තෙත් බිම් උද්භිද උද්‍යානය
කොළඹ-අවිස්සාවේල්ල පාරෙ කලුඅග්ගල හංදියට ගිහින් එතනින් දණුට දාන්න. ඒ කියන්නෙ කලුඅග්ගල-ලබුගම පාරට. ඒ පාරෙ ඉස්සරහට යද්දි මුණගැහෙන තුම්මෝදර හංදියෙන් වමට දාලා (තුම්මෝදර-පුවක්පිටිය පාර) ටික දුරක් ආවාම තමයි සීතාවක පාර්ක් එක හමුවෙන්නෙ. ඇතුලට යන්න නම් රු. 50ක 60ක ටිකට් එකක් ගන්න වෙයි. හැබැයි ඉතින් පාඩු නෑ. මොකද හිතේ හැටියට ඇවිදින්න, කන්න බොන්න, විනෝද වෙන්න පුුලුවන්නෙ. පරිසරයත් හරිම නිස්කලංක නිසා රිලැක්ස් වෙන්න කියාපු තැන. පොඩි අවුලකට තියෙන්නෙ සතා සීපාවා දැක ගන්න බැරි එක තමයි. අඩු පාඩුව සර්පයෙක් දෙන්නෙක් නම් එහෙන් මෙහෙන් ඉන්නව. හැරත් කුරුල්ලො පිරිලා ඉන්න නිසා වට පිටාව හරිම ලස්සනයි. ඒක නෙවෙයි රු. 200ක් වගේ ගාණකට පොඩි බෝට්ටු සවාරියක් යන්නත් පුලුවන්.
2. අත්තිඩිය කුරුලු අභය භූමිය
අවාසනාවන්ත ඉරණමක් අත්වුනු ලස්සන තැනක්. දැනට අවුරුදු 10කට විතර කලින් බෙල්ලන්විල, අත්තිඩිය ඇත්තටම කුරුලු අභය භූමියක්. ජලාශ්‍රිත කුරුල්ලො පිරිලා. කොටින්ම කියනව නම් ඉස්කෝල වලින්, කැම්පස් වලින් පවා ක්ෂේත්‍ර චාරිකා එක්කන් ගියපු තැනක්. ඒත් අද වෙද්දි ඒකෙන් භාගයක් වත් ඉතුරු වෙලා නෑ. අත්තිඩිය වැව වට කරලා හදපු ඇවිදින මංතීරු, කොන්ක්‍රීට් බංකු, අවන්හල නිසා කුරුල්ලන්ට වැඩිය ඉන්නෙ මිනිස්සු.
ඒකෙන් මේකෙන් වැඩක් නෑ, කොහොම වුනත් හවස් ජාමෙට නම් මෙතන හරිම ලස්සනයිනෙ. තොර තෝංචියක් නැති කුරුලු හඬ මැද්දෙන් ඉඳල හිටල වාහන සද්දයක් ඇහුණට පොඩ්ඩක් රිලැක්ස් වෙන්න කියාපු තැන. ඒ හැරුණාම කුරුල්ලන්ගෙ ෆොටෝ ගන්න අයටත් අත්තිඩිය අභය භූමිය නරකම නෑ. මොකද රු. 200ක් දුන්න නම් කැමරාවත් දාගෙන බෝට්ටු සවාරියක් ගිහින් ලස්සන ෆොටෝ ටිකකුත් අරගෙනම එන්න පුලුවන්. කොහොම වුනත් අත්තිඩියෙ මේ ඉතුරු වෙලා තියෙන ටිකවත් රැක ගන්න කියන ඉල්ලීම නම් කරන්නම ඕන.
3. හොරගොල්ල ජාතික උද්‍යානය
කොළඹ-නුවර පාරෙ තිහාරිය, මල්වත්ත හංදිය පහුකරන් ඉස්සරහට යද්දි අනගි මාවත මුණ ගැහෙන්නෙ ඔයාගෙ වම් අත පැත්තෙ. එතන ඉඳන් අනගි මාවත දිගේ කිලෝමීටර 2ක් 3ක් විතර ගියාම හොරගොල්ල ජාතික උද්‍යානයට පිවිසෙන්න පුලුවන්.
ක්ෂීරපායි සත්තුන්ගෙ ඉඳන් කුරුල්ලො, සමනල්ලු, සර්පයො, උභය ජීවියො වෙනකම් ලොකු ජෛව විවිධත්වයක් තියෙන මේ පුංචි වනෝද්‍යානය අපි දන්න විදියට නම් කොළඹට කිට්ටුවෙන් තියෙන හොඳම, ලස්සනම කැලය. ගස් කොලන් වලිනුත් පිරිලා තියෙන නිසා පරිසරයත් හරිම නිස්කලංකයි. අතරින් පතර ඇහෙන කුරුල්ලන්ගෙ කීචි බීචිය හිතට ගේන්නෙ පුදුම සැහැල්ලුවක්.
හොරගොල්ල ජාතික උද්‍යානයෙ අපූරු පුංචි කෞතුකාගාරයක් වගේම සත්ව සායනයකුත් තියෙනව. හැබැයි කැන්ටින් එකක් නම් නෑ. ඒ නිසා මතක ඇතුව එළියෙන් කෑම අරගෙන යන්න. අනේ ඒත් පොලිතින් නම් දාන්න එපා. කියන්න බැරි වුනානෙ, මේකට ඇතුල් වෙන්න රු. 50ක ටිකට් එකකුත් ගන්න වෙනව.
4. තලංගම වැව
තලංගම වැව කිව්වට ගොඩ දෙනෙක් මේක දන්නෙ අකුරෙගොඩ වැව කියල.
අත්තිඩියට වෙච්ච දේම තමයි මේකටත් වෙලා තියෙන්නෙ. මුලු වැව වටේටම ගෙවල් හදල නිසා දැන් ඉස්සර තරම් කුරුල්ලො නෑ. හැරත් බෝට්ටු සවාරි සර්විස් එකත් නෑනෙ. ඒත් වැව වටේට බංකු එහෙමත් ගහල තියෙන නිසා පොඩි කයියක් දාගෙන ඉන්න පුලුවන්.
ජලාශ්‍රිත පක්ෂීන් තමයි ගොඩක්ම තලංගම වැව වටේට ඉන්නෙ. ඒ හැරුණාම සර්පයො, උභය ජීවියො එහෙමත් ඉඳල හිටල දැක ගන්න පුලුවන්. කොච්චර වුනත් හවස් ජාමෙට නම් වැව වටේට හරිම නිස්කලංකයි. ඉර බැහැගෙන යද්දි වැව් ඉවුර හරිම ලස්සනයි. ඇත්තටම හුදකලා වෙන්න කියාපු තැන.
5. ගුරුගේ ස්වභාවික උද්‍යානය
කොළඹ-මීගමුව පාරෙ කපුවත්ත පහු කරන් ඉස්සරහට ගියාම දකුණු පැත්තට හැරෙන්න තියෙන ජාඇල- ගනේ මුල්ල පාර මුණ ගැහෙනව. ඒ පාරෙ කිලෝමීටරයක් විතර දුරින් තමයි ගුරුගේ ස්වභාවික උද්‍යානය පිහිටල තියෙන්නෙ.
ස්වාභාවික උද්‍යානයක් කිව්වට ඇත්තටම මේක සත්තු වත්තක්. ගොඩක් සත්තු කූඩු කරල ඉන්නෙ. එහෙන් මෙහෙන් සතෙක් දෙන්නෙක් තමයි නිදහසේ ඉන්නෙ. පොඩි හරි විශේෂත්වයකට කියල තියෙන්නෙ ස්වභාවික විදියට හදපු නිර්මාණ ටිකක් තියෙන එක තමයි. එහෙමයි කියල පොඩ්ඩක් රිලැක්ස් වෙන්න බැරි කමක් නෑ. කෑම බීමත් පාර්ක් එක ඇතුලෙම තියෙන නිසා ඒ ගැන විශේෂ සැලකිල්ලක් දක්වන්න ඕනත් නෑ. ඇතුල්වීම් පැකේජ රු. 500 ඉඳන් තියෙනව. බෝට්ටු සවාරි වගේ ඒවත් තියෙන නිසා හොඳට විනෝද වෙලා එන්න පුලුවන්.
6. වෝටර් වර්ල්ඩ්
කැළණිය-බියගම පාරෙ තල්වත්ත පහු කරපු ගමන්ම වම් අත පැත්තට වෙන්න තමයි වෝටර් වර්ල්ඩ් එක තියෙන්නෙ. ඇතුල් වීම රු. 280යි. මේකත් සත්තු වත්තක්. කිසිම ස්වභාවික කෑල්ලක් නම් නෑ. ඒ වුනාට ගුරුගේ එකට වඩා හොඳයි කියල කියන්න පුලුවන් දේවලුත් තියෙනව. කෑම බීම නම් එළියෙන් තමයි ගෙනියන්න වෙන්නෙ. බෝට්ටු සර්විස් එහෙමත් නෑ. කොහොම වුනත් මේකෙ ඇක්වේරියම් එක නම් පට්ට.
ඔය අන්තිමට කියපු තැන් දෙක ගැන නම් අපේ ලොකු සතුටු දායක අදහසක් නෑ. කෝකටත් කියල ඔයාලා දන්න තැනුත් පහලින් කමෙන්ට් කරන්න. එතකොට අපිට වගේම අපේ යාලුවන්ටත් බලා ගන්න පුලුවන්නෙ.
