රස කෑම කන්න තියෙන තැන් ගැන හැමදාම කියන නිසා මම අද හිතුවා ටිකක් වෙනස් දෙයක් ගැන ලියන්න. හැමෝම වගේ දන්නවනෙ ඉතින් පූල් නැත්නම් බිලියඩ්ස් කිව්වාම. මේ ක්‍රීඩාව ලංකාවට එන්නෙ නම් සුද්දන්ගෙන් තමයි. හැබැයි හොඳ ඉවසීමක් ඉලක්කයක් වගේම පූල් ක්‍රීඩාවෙන් හොඳ විනයකුත් පුරුදු වෙනවා. පූල් වල තියෙන්නෙ හරිම සරල නීති රීති ටිකක් වුණාට හොඳට සෙල්ලම් කරන්න නම් පලපුරුද්ද හැරුණාම උසස් තත්වයේ පූල් මේසයක්, බෝල කට්ටලයක් වගේම පූල් පිත්තකුත් තියෙන්න ඕනි. ඉතින් මම දැන් කියන්න යන්නෙ පූල් සෙල්ලම් කරන්න ආස යාළුවන්ට කෝට්ටේ නගරය පැත්තෙන් හොඳ පූල් පාරක් ගහන්න යන්න පුළුවන් තැන් ටිකක් ගැන.
Nitrous Pool Lounge (Koswatte)
හරියටම බත්තරමුල්ල, කොස්වත්තෙ ඩිපෝව ඉස්සරහ තියෙන දෙමහල් ගොඩනැගිල්ලෙ උඩ තට්ටුවෙ තමයි මේ තැන තියෙන්නෙ. මුළුමනින්ම වායු සමනය කරලා තියෙන ක්‍රීඩාගාරය ඇතුලෙ සෙල්ලම් කරන්න හොඳට ඉඩ තියෙන්න පූල් මේස තුනක් දාලා තියෙනවා. ප්‍රමිතියට අනුව විදුලි බුබුළු හයි කරලා නිසා මේසය පුරා තියෙන ඕනම ඉලක්කයක ලේසියෙන් සෙල්ලම් කරන්න පුළුවන්. විශේෂයෙන් කියන්න ඕන මෙතන තියෙන මේස තුනේම මේසය මත පාපිස්ස නැත්නම් ඇතිරිල්ල පළුදු වීම් වලින් ගොඩක් අඩුයි. බෝල කට්ටලත් සෑහෙන්න දුරට අලුත්. පළුදු වීම් නැති ඒවා.
උස දෙකකින් වගේම තුඩු ප්‍රමාණ දෙකකින් තියෙන පූල් පිති හතරකට වැඩි ගණනකුයි x පිති දෙකකුයි හැම මේසෙකටම වෙනමම තියෙන නිසා සෙල්ලම අතරෙ පිති හොය හොය තැන තැන දුවන්න ඕනිත් නෑ. ක්‍රීඩාගාරයෙ අයිනකට වෙන්න සෝපාවකුත් දාලා තියෙන්න කැමති අයට විවේක ගන්න පුළුවන් වෙන්න. හැබැයි ක්‍රීඩාගාරය ඇතුලෙ දුම් බොන්න නම් තහනම්. 'නයිට්‍රස් පූල් ලවුන්ජ්’ එකේ හැම දෙයක්ම වගේ හොඳ ප්‍රමිතියට තියෙන නිසා පැයකට රුපියල් 400ක් ගෙව්වට පාඩු නෑ කියල තමයි මට නම් හිතෙන්නෙ. (011 2075020)
Kelibima (Thalawathugoda)
තලවතුගොඩ හන්දියෙ SISIL ගොඩනැගිල්ලට අල්ලලා දකුණු පැත්තට වෙන්න තියෙන ගොඩනැගිල්ලෙ පලවෙනි තට්ටුවෙ තියෙන මේ පූල් ක්‍රීඩාගාරයට තමයි තත්වයෙන් දෙවනි තැන දෙන්න පුළුවන් වෙන්නෙ. හැබැයි මෙතන නම් තියෙන්නෙ පූල් මේස දෙකයි. ක්‍රීඩාගාරය වායු සමනය කරල තිබුණට ඇතුලෙ දුම් පානය කරන්න තහනමක් නෑ. ආලෝකකරණයත් ගොඩක් දුරට හොඳයි. බෝල කට්ටලත් පළුදු වීම් වලින් අඩුයි. මේසය මත ඇතිරිලි තැනින් තැන, පොඩ්ඩක් පළුදු වෙලා තිබුණට සෙල්ලමට නම් බාධාවක් නෑ.
කෙළිබිමෙත් උස වගේම තුඩු ප්‍රමාණ දෙකකින් වගේ තියෙන පූල් පිති හතරකුයි x පිත්තකුයි මේස දෙකට වෙන වෙනමම තියෙනවා. පැයකට රුපියල් 300ක වගේ සාධාරණ ගාණකට හොඳ ප්‍රමිතියක් තියෙන තැනක පූල් සෙල්ලම් කරනවනම් ඉතින් තලවතුගොඩ කෙළිබිම තමයි. (077 7666075)
Chill (Thalawathugoda)
පොදුවේ ගත්තාම පූල් මේස, බෝල කට්ටල වගේම පිතිත් තරමක් අඩු ප්‍රමිතියකින් තියෙන තැනක් තමයි 'චිල් පූල් ක්‍රීඩාගාරය කියන්නෙ. තලවතුගොඩ හේමාස් රෝහල ඉස්සරහ පෙරේරා මාවතට හැරෙන කොටම තියෙන ගොඩනැගිල්ලෙ උඩ තට්ටුවෙ තියෙන මේ පූල් ක්‍රීඩාගාරයෙත් ඇතුලත වායු සමනය කරල තියෙනවා. ඒ නිසා ක්‍රීඩාගාරයෙන් එළියෙ වෙනමම තියෙන පුංචි කොටසක තමයි දුම් බොන්න තියෙන්නෙ. වැඩිපුරත් එක්ක ඉඩ තියෙන්න පූල් මේස තුනක් දාලා හදලා තිබුණට මේස මත ඇතිරිලි නම් ටිකක් පළුදු වෙලා.
ඒ විතරක් නෙවෙයි, ගොඩක් කල් පාවිච්චි කරලා නිසාද කොහෙද සුමට ගතියත් නෑ. බෝල කට්ටලත් අලුත් ඒවා නම් නෙවෙයි. ඒවගෙත් පොඩි පොඩි පළුදු වීම් තියෙනවා. ලොකුම ප්‍රශ්නෙ තමයි මෙතන තියෙන පූල් පිති එකම ප්‍රමාණයෙන් තියෙන එක. අනික මේසයකට වෙන් කරලා තියෙන්නෙ පිති දෙක තුනයි. ඒ නිසා මම නම් දකින්නෙ 'චිල් පූල් පාලර්' එකේ පැයකට අය කරන රුපියල් 350 නම් ටිකක් වැඩියි කියලා. (0777676462)
Sanhinda sports complex (Nugegoda)
සංහිඳ කියන්නෙ පූල් ක්‍රීඩාගාරයක් විතරක්ම නෙවෙයි. නුගේගොඩ ස්ටැන්ලි තිලකරත්න මාවතේ තියෙන මේ ක්‍රීඩා සංකීර්ණයේ භෝජනාගාරය තියෙන තියෙන ගොඩනැගිල්ලෙ පලවෙනි තට්ටුවෙ තමයි පූල් සෙල්ලම් කරන්න තියෙන්නෙ. ඇත්තෙන්ම එතන පූල් සෙල්ලම් කරන්නම කියල හදපු තැනක් නම් නෙවයි. වායු සමනය කරලත් නෑ. මේස දෙකක් දාලා තිබුණට නඩත්තු කරන්නවත් ක්‍රීඩකයින්ට ඔන වෙන දේවල් දෙන්නත් කවුරුත් නෑ. ඒත් කමක් නෑ ප්‍රමිතියට පූල් මේස ටික තියෙනවනම්. එහෙමත් නෑ. මේස වල ඇතිරිලි ගොඩක්ම පළුදු වෙලා.
ඒ මදිවට මේසෙ වලවල් ළඟට පවුඩර් දාලා හරියට කැරම් සෙල්ලම් කරන කොට වගේ. සමහර බෝල වල තියෙන ලොකු පළුදු වීම් නිසා ඉලක්කයකට පහර දෙන්න බෑ. තෝරා ගෙන සෙල්ලම් කරන්න කියල ප්‍රමාණ කීපයක පූල් පිති ඇත්තෙත් නෑ. ඇත්තටම කියනවනම් පැයට රුපියල් 250ක් ගෙවලා සංහිඳේ පූල් සෙල්ලම් කරන එකේ නම් තේරුමක් නෑ. (011 2 768166)
