ලෝකේ හැදිලා තියෙන්නේ නීතිවලින් කිව්වොත් හරි. අපි කන්නේ, බොන්නේ ජීවත්වෙන්නේ මේ හැම දේම කරන්නේ නීතිමය රාමුවක් ඇතුළේ. එහෙම වුණාට මේ ලෝකෙට එහෙමත් නැත්නම් නීතියට යටින් තවත් ලෝකයක් තියෙනවා. අන්ඩවර්ල්ඩි නැත්නම් පාතාලේ කියන්නේ ඒකට. නම වගේම පාතාලේ කියන්නේ සුන්දර තැනක් නෙමෙයි. එකඑක හේතු නිසා පාතාලෙට සම්බන්ධවෙන අයට ඒකෙන් ගැලවිලා යන්න ලේසි නැහැ. පාතාලෙත් එක්ක සම්බන්ධවෙන් බහුතරයක් දෙනාට තමුන්ගේ සම්පූර්ණ ජීවිතකාලේ ජීවත් වෙන්න ලැබෙන්නේ නැහැ. කොළඹ මේ වෙද්දී පාතාලේ සැර අඩුවෙලා තිබුණත් 70 දශකයේ ඉඳලා 90 දශකය ඉවර වෙනකම් පාතාලේට කොළඹ ලොකු තැනක් තිබුනා. සමහරක් පාතාල චරිත හොලිවුඩ් ෆිල්ම්වල චරිත වගේ තමයි. මේ කියන්න හදන්නේ ලංකාවේ හිටපු සුපතල පාතාල නායකයෝ කිහිප දෙනෙක් ගැන.
ධම්මික අමරසිංහ
http://www.thesundayleader.lk
ධම්මික අමරසිංහ කියන්නේ ලංකාවේ ටෝනි මොන්ටානා කියලා කියන්න පුළුවන්. ඉක්මනින්ම කේන්තියන, කාවවත් විශ්වාස නොකරන සල්ලිවලට ඕන දෙයක් කරන්න පුළුවන් කෙනෙක් විදියට තමයි ධම්මික ප්‍රසිද්ධ. ධම්මික කියන්නේ තවත් සුප්‍රසිද්ධ පාතාල නායකයෙක් වෙච්ච චින්තක අමරසිංහගේ මල්ලී. චින්තකගේ හෙවණැල්ලට වැහිලා ඉන්න ධම්මික පාතාල නායකයෙක් විදියට එළියට එන්ගේ චින්තක ඝාතනය වුණයින් පස්සේ. ධම්මිකට පාතාලේ කියන්නේ ඒ තරම් ආගන්තුක තැනක් නෙමෙයි. ඔහුගේ පවුලේ සාමාජිකයින් 16 දෙනෙක් පාතාලේ කේස් නිසා මැරිලා තියෙනවා.
කොහොමහරි 1990ත් 2004ත් අතර කාලයේ වෙච්ච ඝාතන 50කට සහ බැංකු මංකොල්ලකෑම් 17ක අවශ්‍ය වෙලා තිබුණ පුද්ගලයෙක් විදියට ධම්මික හඳුන්වන්න පුළුවන්. ඒ වගේම තවත් ප්‍රබල පාතාල නායකයෙක් වෙච්ච බැද්දගාන සංජීව, සොත්ති උපාලි ඝාතනය කිරීමේ චෝදනා එල්ල වෙන්නෙත් ධම්මික ඇතුළු කණ්ඩායමට. 2004 ජනවාරි 09 වෙනිදා අලුත්කඩේ මහේස්ත්‍රාක් උසාවියේ කාමර අංක 06 දී කොන්ත්‍රාත් මිනීමරුවෙක්ගේ වෙඩිපහරින් ඝාතනය වෙනවා. ධම්මික ලවා තමුන්ගේ වැඩකරගත්ත දේශපාලඥයෝ තමුන්ව හෙලි කරයි කියන බයට කොන්ත්‍රාත් මිනිමරුවෙකු ලවා ඔහුව ඝාතනය කරන්න ඇති කියල තමයි කියන්නේ.
බැද්දෙගානේ සංජීව
http://www.thesundayleader.lk
සංජීව පෙරේරා එහෙම නැත්නම් බැද්දගාන සංජීව කියන්නේ 90 දශකයේ ලංකාවේ බිහිවෙච්ච නමගියපු පාතාල නායකයෙක්. බැද්දේගානේ සංජීව ප්‍රසිද්ධ වෙන්නේ රූකාන්ත චන්ද්‍රලේඛා දෙදෙනාට පහරදීම සහ ඔවුණ්ගේ කොණ්ඩා කැපීමේ සිදුවීම නිසා. මීට අමතරව සටන පුවත්පතේ කතෘ රෝහණ කුමාර ඝාතනය, අනෝජා වීරසිංහගේ නිවසට ගිනිතැබීම, සන්ඩේ ලීඩර් කතෘ ලසන්ත වික්‍රමතුංගට පහරදීම වගේ අපරාධ ගණනාවකට චෝදනා එල්ලවෙච්ච පුද්ගලයෙක්. ඒ වගේම බැද්දගාන සංජීවට දේශපාලනිකවත් ලොකු බලයක් තිබුණා. චන්ද්‍රිකා කුමාරතුංග බස්නාහිර පළාත් සභාවේ මහ ඇමතිනිය විදියට කටයුතු කරද්දි ඇගේ පෞද්ගලික ආරක්ෂකයෙකු වෙන සංජීව ඇය ජනාධිපති ධූරයට පත්වෙනවත් එක්ක ඇගේ ආරක්ෂක ආරක්ෂක අංශයේ සාජන්වරයෙක් බවට පත්වෙනවා. කොහොමහරි 2001 නොවැම්බර් 02 වැනිදා සංජීව ඝාතනය වෙනවා. අමරසිංහ කල්ලිය මේ ඝාතනය කළා කියලා තමයි කියන්නේ.
ගෝනවල සුනිල්
http://www.lankanewsweb.today
සුනිල් පෙරේරා එහෙමත් නැත්නම් ගෝනවල සුනිල් කියන්නේ ලංකාවේ මුල් කාලේ ඒ කියන්නේ 70 දශකයේ බිහිවෙච්ච පාතාල නායකයෙක්. සුනිල් ප්‍රසිද්ධ වෙන්නේ 1983 වැලිකඩ සමූල ඝාතනය සම්බන්ධයෙන් චෝදනා එල්ලවීම නිසා. මේ සමූල ඝාතනයේ දී වැලිකඩ බන්ධනාගාරේ හිටපු දමිල සිරකරුවන් 53 දෙනෙකු ඝාතනය වෙනවා. ඒ වගේම තවත් ප්‍රසිද්ධ සිදුවීම් තමයි මිනීමැරුමකට චැරදිකාරයා විදියට තීන්දුව ලැබිලා සිරදඬුවම් විඳිද්දී ඒ වෙද්දී ජනාධිපති වුණ ජේ.ආර්. ජයවර්ධන ජනාධිපති සමාවක් ලබලා දීලා නිදහස් කිරීම. ඒ විතරක් නෙමෙයි එතැනින් පස්සේ ඔහුට දිවයිනටම බලපැවැත්වෙන සාම විනිසුරුකමකුත් ලබාදෙනවා. (මේවගේ දේවල් වෙන්නේ ලංකාවේ විතරක් වෙන්න ඕන.) ඒ වගේම සුනිල් වර්තමාන අගමැති රනිල් වික්‍රමසිංහගේ ආරක්ෂකයෙක් විදියටත් කටයුතු කරලා තියෙනවා. 1987 දී පොලිස් වෙඩිපහරට ලක්වෙලා සුනිල් ඝාතනය වෙනවා.
සොත්ති උපාලි
http://www.lankanewsweb.today
ලංකාවේ පාතාලේ ගැන කතාකරද්දී සොත්ති උපාලි කියන්නේ කතා නොකරම බැරි චරිතයක්. දේශපාලන බලය අතින් ගත්තත් මැර බලය අතින් ගත්තත් උපාලිට සමකරන්න පුළුවන් කෙනෙක් හිටියා කියලා හිතන්න අමාරුයි. කොච්චර බලවත් ද කියලා කිව්වොත් පොලීස් ස්ථානාධිපතිවරු පවා සර් කියලා කතාකරන ඩී.අයි.ජී. ලා මචං කියලා කතාකරන තත්ත්වයක් තමයි තිබිලා තියෙන්නේ. හිටපු ප්‍රබල දේශපාලඥයෙක් වෙච්ච ලලිත් ඇතුලත්මුදලිගේ ඝාතනයට උපාලි කෙළින්ම සම්බන්ධ බව ඒ ගැන හොයලා බලන්න පත්කරපු ජනාධිපති කොමිසම තීරණය කළත් නඩු විභාගය අවසන් කරන්න කලින් 1998 දී ධම්මික අමරසිංහගේ කල්ලිය උපාලිව ඝාතනය කරනවා.
නාවල නිහාල්
http://www.lankaweb.com
ගෝඩ්ෆාදර් චිත්‍රපටියේ එන දොන් විටෝ කෝලියෝන් ලංකාවේ හිටියා කියලා හිතන්න; ඒ තමයි නාවල නිහාල්. පාතාල නායකයෙක් වුණාට නාවල නිහාල් කවදාවත් මත්ද්‍රව්‍ය වෙළඳාම හරහා මුදල් උපයපු පාතාල නායකයෙක් නෙමෙයි. ඒ වෙනුවට නිහාල් කළේ කප්පම් ගැනීම්, බලෙන් අල්ලගෙන ඉන්න ඉඩම් නිදහස්කරලා දෙන එක, ගෙවන්නේ නැති ණය ආපහු අයකරලා දෙන එක වගේ දේවල්. ඒ වගේම සාධාරණ පුද්ගලයෙක් විදියටත් නිහාල් නමක් දිනාගෙන හිටපු කෙනෙක්. හැබැයි ඒ වුණාට කෘරත්වය අතින් නිහාල්ගේ වැඩවල අඩුවක් තිබුණා කියලා කියන්න බැහැ. තවත් නම ගියපු පාතාල නායකයෙක් වෙච්ච කළු අජිත් ඇතුළු 5 දෙනෙක් පැහැරගෙන ගිහින් වද දීලා වෑන් එකක දාලා පුච්චලා මැරුවේ නාවල නිහාල් තමයි. කොහෙම වුණත් නිහාල්ගේ අවසානය සිද්ධ වෙන්නේ නිහාල්ගෙම අනියම් පෙම්වතියක් අතින්. දිනය සහ තැන පැහැදිලි නැති වුණත් කොළඹින් පිට තියෙන ආදාහනාගාරයකට නාවල නිහාල් ගෙනිහින් පනපිටින් පිලිස්සුවා කියලා ඔහුගේ පෙම්වතිය පොලීසියට පාපොච්චාරණය කරලා තියෙනවා.
