අත් වැල් බැඳගෙන වැල්ලේ ඇඳි ඒ රූ රටා
මැකී ගියා රැල්ලෙන් විසල රැයේ…
ආදරණීයයන් දෙන්නෙක් අතරෙ ඇති වෙන ප්‍රේමණීය හැඟීම් වලට පණ පොවන්න සුන්දර වෙරළ තීරයකට වඩා ගැලපෙන තැනක් තවත් තියෙනවද? ඉර බැහැගෙන යන හැන්දෑවක අත් වැල් බැඳගෙන වෙරළ දිගේ ඇවිදිද්දි තෙපලෙන ආදර කතා, එයාලගෙ රාත්‍රිය සුන්දර කරන්න මැවෙන හීන වගේ. ඉතින් කවුද ආස නැත්තෙ සිහිල් මුහුදු හුළඟක ආශ්වාදයට තුරුළු වෙලා රැයක් පහන් කරන්න.
ලංකාව වටේට පිහිටල තියෙන ලස්සන වෙරළ තීරය, ඒ ලස්සනත් එකතු වෙලා ගොඩ නැගුනු අපූරු හෝටල් ගණනාවකින් හැඩ වෙලා තියෙන්නෙ. ඒත් අවාසානාවට අපි ගොඩ දෙනෙක් ඒ ගැන හරි හැටි දන්නෙ නෑ. ඔන්න ඔය නිසාමයි සුන්දර බීච් හෝටල් ටිකක් ගැන අපි ඔයාලට කියන්න හිතුවෙ. යුවලකට වගේම පවුලේ උදවියකට වුනත් ගිහින් අපූරු නිවාඩුවක් ගත කරල එන්න කියාපු තැන් ටික. හැරත්, සුන්දර අත්දැකීම් ගොන්නක් ඔයාල ජීවිතේ නොමියෙන මතකයන් අතරට එකතු වෙද්දි දැනෙන සතුට, ආයෙ කවදා ගන්නද? නේ.
1. Chena Huts (Yala)
යාල කැලේ ඇතුලෙ අලි, කොටි, වලස්සු විමානෙ බිම් පැලක සුවසේ නිවාඩුව ගත කරන්න කියාපු හෝටලය. ඒ විතරක් නෙවෙයි අපිට හමුවුන අමුතුම ලස්සනක් තියෙන බීච් හෝටලය. කෑම බීම අතින් නම් උපරිමයි. ඉස්සරහින් තියෙන්නෙ ගල්පර වලින් අඩුවක් නැති පුළුල් වෙරළ තීරය. නිල් කැටේට වතුර තියෙන මුහුදත් හරිම ලස්සනයි. උදේ පාන්දරටයි හවස් ජාමෙටයි තමයි මේ බිම් පැල් ටිකේ සුන්දරත්වය දෙගුණ තෙගුණ වෙන්නෙ. ඇත්තටම චෙනා හට් හෝටලයෙ ගෙවෙන රැය නම් කවදාවත් අමතක වෙන එකක් නෑ. සැප්තැම්බර් ඉඳන් අප්‍රේල් වෙනකම්ම කල් තියෙන නිසා හොඳ වෙලාවක් බලල නිවාඩුව දාගන්නකො.
2. Anilana (Pasikuda)
by tripadvisor
සුපිරි බීච් හෝටල් අත් දැකීමක් ගන්න කියාපු තැනක් තමයි පාසිකුඩා වෙරළ තීරයෙ තියෙන අනිලානා හෝටලය. පාසිකුඩා බීච් එක ගැන ඉතින් අමුතුවෙන් කියන්න ඕන නෑනෙ. ඉමක් කොනක් පේන්නෙ නැති නිල් පාට මුහුදුකරේ දවස පුරාම හරිම ලස්සනයි. හැබැයි සැප්තැම්බර්, දෙසැම්බර් අතර කාලයෙ යන්න ඕන. හෝටලේ කෑම බීම ටික වගේම අනිත් පහසුකමුත් පංකාදු පහට තියෙනව. හිතා ගන්න බැරි සුපිරි පන්නයේ හෝටලයක් වෙලත් මෙයාලගෙ ගාණ මෙච්චර අඩු ඇයි කියල තමයි.
3. Whiskey Bay Surf Resort (Arugam Bay)
ආරුගම් බොක්ක මුහුදු තීරය ගැනත් ඒ හැටි විස්තරයක් ඕන නෑනෙ. සර්ෆින් නම් ආරුගම් බේ වගේ තමයි. විස්කි බේ රිසෝට් එක තියෙන්නෙ ආරුගම් බේ වෙරළ තීරයෙ නිදහස් පැත්තකට වෙන්න. මේ හෝටලයෙ තියෙන විශේෂත්වය තමයි පොඩි පොඩි ගෙවල් විදියට ලී වලින් හදල පිදුරු හෙවිලි කරල හැඩ වුනු එක. හැන්දෑවට රතු පාට වෙන අහසෙ හෙවණැල්ල විස්කි බේ හෝටලයට වැටුනාම හරිම ලස්සනයි. මාර්තු ඉඳන් ඔක්තෝම්බර් අතර කාලෙට ඒ ලස්සන දෙගුණ තෙගුණ වෙනව. රස කෑම තොගයක් එක්ක විස්කි බේ හෝටලයෙ රැයක් ගත කරන්න… ඒත් ඇඳිරි වැටීගෙන එද්දි වෙරළ කිට්ටුව දැල්වෙන ගිණි මැලයට, කැලිප්සෝ තාලය ගේන අපූර්වත්වය නම් කියල නිම කරන්න බැරි වේවි.
4. Saman Villas (Benthota)
by booking.com
ගල් පරයක් උඩ හදපු සුපිරි හෝටලයක්. කෑම බීම වගේම අනිත් පහසුකම් වලිනුත් කිසිම අඩුවක් නෑ. මේ ඔක්කොටම වඩා අත්විඳින්න දෙයක් සමන් විලාස් එකේ තියෙනව. ඒ තමයි ඉර බැහැගෙන යද්දි ගල් පරය උඩට පේන පුළුල් දර්ශන තලයෙ ආශ්වාදය. අඩි ගාණක් පහතින් පේන මුහුදත් රතු පාටට පෙණ කැටි විසුරුවන්නෙ හෝටලය වටේට පලසක් එලන්න වගේ. දිග වෙරළ තීරයක් නැතිකමේ අඩුපාඩුව වත් නොදැනෙන්න තරම් හවස් ජාමෙට සමන් විලාස් හෝටලය ලස්සනයි.
5. Jungle Beach Resort (Trincomalee)
by ugaescapes
කැළේ ඉඳන් වෙරළෙ සුන්දරත්වය අත් විඳින්න විතරක් නෙවෙයි වෙරළෙ ඉඳන් කැළේ සුන්දරත්වයත් අත් විඳින්නත් කියාපු හෝටලයක් තමයි කුච්චාවෙලි ජන්ගල් බීච් එකේ තියෙන ජන්ගල් බීච් රිසෝට් එක. ලී වලින් හදල පිදුරු හෙවිලි කරපු ලස්සන ගෙවල් ටිකක් තමයි මේ හෝටලයෙත් තියෙන්නෙ. කෑම බීම, සුවපහසු කම් ටිකත් නියමෙටම තියෙනව. සැප්තැම්බර්, නොවැම්බර් කාල වලට කුච්චාවෙලි වෙරළ තීරය කුරුළු හඬින් රැව් දෙද්දි වට පිටාවෙ ඇති වෙන සුන්දරත්වය නම් කියල නිම කරන්න බැරි තරම්.
6. Shingawa Beach (Balapitiya)
by deltatravel
නවීන පන්නයට ඉදිවුනු බලපිටියෙ ෂින්ගාවා බීච් හෝටලයත් අගෝස්තු, දෙසැම්බර් කාල වලට හරිම ලස්සනයි. නිල් පාට මුහුදු තිරයකින්, ලස්සන, පුළුල් වෙරළ තීරයකින් වගේම මුහුද පැත්තට ඇදුනු අපූරු ගල් පාලමකින් හැඩවුනු ෂින්ගාවා හෝටලය සුව පහසුව අතින් නම් ගොඩක්ම ඉහලයි. ඒ විතරක් නෙවෙයි කෑම බීමත් සුපිරි.
7. Maluu Maluu Resort & Spa (Pasikuda)
by maluumaluu
ගොඩ දෙනෙක් දන්න කියන තැනක්. හරිම නිස්කලංක, පුළුල් වෙරළ තීරයක පිහිටපු හෝටලයක්. සුව පහසුව, කෑම බීම ගැන නම් අමුතුවෙන් කියන්න ඕන නෑ, සුපිරිම තමයි. විශේෂයෙන් කියන්න ඕන මාළු මාළු හෝටලයෙ තියෙන ලස්සන ගැන. ලී වලින් තමයි හදල තියෙන්නෙ. හැබැයි වහලට පිදුරු හෙවිලි කරල නෑ. නිල් කැටේට පේන පාසිකුඩා මුහුදු තීරය සැප්තැම්බර්, දෙසැම්බර් කාල වලට ස්නෝකෙල් කරන්න, ඩයිවින් කරන්න වගේම ස්ර්ෆින් කරන්නත් කියාපු. රතු පාට වුනු ක්ෂිතිජය දිහා බලාගෙන හවස් ජාමෙට ගිණි මැලයක් ගහගෙන පොඩි පාටියක් දාන්න මාළු මාළු හෝටලය නම් නියමයි.
8. Jetwing Blue (Negombo)
මීගමුව බීච් එක ගැන කියන්න නම් අදහසක් නෑ. රුවල් බැඳපු ඔරු එක යායට පාවෙන මුහුදු කරේ හවස් ජාමෙට රතු පාට වුනාම තියෙන ලස්සන බලන්න, යන්න ජෙට් වින්ග් බ්ලූ හෝටලය පැත්තට. කෑම බීම, සුව පහසුව අතින් සෑහෙන්න උඩින් තියෙන ජෙට්වින්ග් බ්ලූ හෝටලයෙ දවසක් ගත කරන්න… හැබැයි ඒ වගේ නෙවෙයි සුන්දර අත් දැකීම් ගොන්නක් එක්ක ගත කරන සුවබර නිවාඩුව. ජීවිතේට අමතක නොවේවි.
9. Anilana (Nilaveli)
අනිලානා පාසිකුඩා හොටලයෙම, නිලාවැලි හෝටලය තමයි මේ. කට්ටිය නම් කියන්නෙ නිලාවැලි හෝටලයට වඩා පාසි කුඩා හෝටලය ලස්සනයි, හොඳයි කියල. ඒත් මට නම් නිලාවැලි හෝටලයයි මුහුදු තීරයයි ලස්සනයි කියල තමයි හිතෙන්නෙ. කොහොම වුනත් කෑම බීම, සුව පහසුකම් ටික නම් එකමයි. විශේෂම දේ තමයි සැප්තැම්බර්, දෙසැම්බර් කාල වලදි නිලාවැලි වෙරළ තීරයෙ හවසට තියෙන ලස්සන. ඇත්තටම ඒ ලස්සන දකින්න නම් එහේ යන්නම වෙනව.
10. Bar Reef Resort (Kalpitiya)
ඩොල්ෆින්ල බලන්න කල්පිටියෙ යන්න. ගිහින් ඉන්නෙ කොහෙද? මෙන්න තියෙනව සුපිරිම තැන. කල්පිටිය ආලන්කුඩාවෙ බාර් රීෆ් රිසෝර්ට් එක. උදේට බෝට්ටු සවාරි යන්න, දවල්ට රස කෑම කන්න, හවස් ජාමෙ අල්ලල පොඩි ස්නෝර්කෙල් පාරක් දාන්න කියාපු තැන. එතකොට ඉර බැහැගෙන යන හැන්දෑවෙ ඉමක් කොනෙක් පේන්නෙ නැති මුහුදයි වෙරළයි දිහා බලාගෙන හීනියට පොඩි ෂොට් එකක් දාන්නත් පුළුවන්. මොකද මෙයාල ලඟ තියෙනව රසම රස සී ෆුඩ් බයිට් ජාති. නියමයි නේ.
හා හා, දැන් කට්ටිය නිවාඩුව ප්ලෑන් කලා වගේ නෙවෙයි ඔයාල දන්න මේ වගේ බීච් හෝටලුත් කමෙන්ට් කරන්න. මොකද අපේ තව යාළුවො ඉන්නව ඒව දැන ගන්න ආස.
