මගුලක් කනව කියන්නෙත් මළ මගුලක්. දන්නව නේ, දිලිසෙන ඇඳුමක් ඇඳන් ගිහින් පුටුවක් දෙකක් රත්කරලා, තියන දෙයක් බඩට දාගෙන ඕපදූප ටිකකුත් හොයාගෙන එන එකට තමයි මගුලක් කියන්නේ.
මගුල් ගෙවල්වලට එන මිනිස්සුන්ට තියනව විවිධාකාර කුසලතා. සමහරු යන්නෙ ම පම්පෝරි ගහන්න. තව සමහරු යන්නෙ අනික් අයගෙ විලාසිතා බලන්න. තවත් සමහරු යන්නෙ කනින් කොනින් ගොසිප් අහුලගෙන එන්න. මේ අතරෙ ඉන්නව කන සාක්කුවට වැටෙනකන් බොන්න ම හිතාගෙන යන අයත්. මේ ඔක්කොට ම වඩා විශේෂයි, කන්න ම බලන් මගුල් ගෙවල්වලට රිංගන උදවිය.
කෑම තමන්ගෙ එකම අරමුණ කරගෙන වෙඩින්වලට යන අයගෙත් විවිධ වර්ග ඉන්නවා. මේ කියන්නෙ එහෙම කෑමදාසලා ජාති අටක් ගැන. ඔයා අයිති ගොඩ කෝකද කියල කියෝලම බලන්නකො…
බයිට් බුලට්
මේගොල්ලන්ගෙ උනන්දුව තියෙන්නෙ අර අච්චර විසාලෙට දාන බුෆේ එක ගැන නෙමෙයි. ඊට කලින් මේසෙට එන පොඩි පොඩි ස්නැක්ස්, බයිට් වගේ දේවල් ගැන. මේ ජාතියෙ බයිට් මරුවෙක් මේසෙ ඉන්නව නං, සැරෙන් සැරේට ගෙනත් තියන බැදපු කජු, මුරුක්කු, චිකන් ඩෙවල් වගේ ඒව එහෙ බලල මෙහෙ බලද්දි වාෂ්ප වෙලා.
අතුරු(පස)මිතුරු
බුෆේ එක ඕපන් කරාම අනික් අය සුප්, සැලඩ් නැත්තං රයිස් ඇන්ඩ් කරිවලින් කන්න පටන්ගත්තට, මෙයාලගෙ වැඩ අග ඉඳන් මුලට. ඒ කියන්නෙ මෙයාල මුලින් කන්නෙ ඩෙසට්. ඊළඟට කන්නෙත් ඩෙසට්. ඩෙසට් වට දෙක තුනකට වග කිව්වට පස්සෙ, බඩේ ඉඩ තිබුණොත් තමයි මෙයාල බත් දිහා බලන්නෙ.
ෆුඩ් බ්ලොගර්
කනවට වැඩිය කනව කියල පෙන්නන්න මහන්සි වෙන අය දැකල තියනව ඇති නෙ? #foodporn තමයි මේගොල්ලන්ගෙ ජාතික හෑෂ්ටැග් එක. කෑමවල, බයිට්වල, ඩ්‍රින්ක්ස්වල, වෙඩින් කේක්වල විතරක් නෙමෙයි, බුෆේ එකෙත් ෆොටෝ අරං එඩිට් කරල ෆිල්ටර්ස් දාල, කැප්ෂන් හෑෂ්ටැග් දාල අප්ලෝඩ් කරල තමයි කන්න පටන්ගන්නෙ.
බෙබා
අමුතුවෙන් කියන්න දෙයක් නෑනෙ මෙයාල ගැන. ඔක්කොමල කාල බීල ඉවර වෙලා බුෆේ එක වහන්න ඔන්න මෙන්න තමයි මෙයාල කෑමට සැරසෙන්නෙ. ඇයි ඉතින් ‘මේක නං අන්තිම ෂොට් එක’ කිය කිය අන්තිම ලාස්ට් ෆයිනල් ෂොට් දහයක් විතර දාල නෙ ඒ වෙද්දි.
කනුකුනු
කිසි ම කෑමකින් බීමකින් සතුටු නොවෙන පුදුම ජාතියක් මේ. හැම කෑමක ම බීමක ම මොකක්හරි අඩුවක් දකින්නමයි මේගොල්ලො ලෑස්ති වෙලා ඉන්නෙ. ලෝකෙ හොඳ ම වෙඩින් බුෆේ එකට ගියත්, කෑමබීම හදල තියන විදිහ, ගෙනත් තිබ්බ විදිහ, දාල තියන දේවල්, රසපදම… මේ සියලු දේවල් ගැන අඩුපාඩු හොයලා මේගොල්ලො විස්තර විචාරය කරනවා. කොච්චර ඥරුඥුරු ගෑවත් එක කෑමක්වත් අතාරින්නෙත් නෑ!
කේක් හොරා
මේ අයත් හරි සුලබයි. මෙයාල වෙඩින් එකට යන ඒකායන පරමාර්ථය තමයි වෙඩින් කේක්. පුළුවන් තරම් කේක් කෑලි එකතු කරගෙන, පර්ස්/ පොකට් පුරවගෙන එන එක මෙයාලගෙ විනෝදාංශේ. හිස් මේසවල තියල තියන වෙඩින් කේක් ගැන ඇහැගහගෙනමයි ඉන්නේ.
ඩයට් ඩයල්
කොච්චර නානා වර්ගේ ජාති තිබුණත් මෙයාල නෙමෙයි ඒව දිහා ඇහැක් ඇරල බලන්නෙ. සැලඩ් සහ පලතුරු විතරයි මෙයාලට පේන්නෙ. කන ජාතිවල කැලරීස් ගණන් කරන්නත් අමතක කරන්නෙ නෑ.
ඔරිජිනල් කෑමදාස
මේ තමයි කන්න ම වෙඩින් එකට එන ඔරිමජිනල් කෑමදාස. අපරාදෙ කියන්න බෑ, එක ඩිෂ් එකක්වත්, එක ඩෙසට් එකක්වත්, එක ඩ්‍රින්ක් එකක්වත් අතාරින්නෙ නෑ. එක වටයක් ගිහින් ඇවිත්, ඇඟට පතට නොදැනී බුෆේ එක පැත්තෙ තව වටයක් දෙකක් කරක් ගහන්නත් මේගොල්ලො හෙන දස්සයි!
